Aj tum yaad be hisab ae!!

aaye kuchh abr kuchh sharaab aaye 
us ke baad aaye jo azaab aaye

baam-e-miinaa se mahataab utare 
dast-e-saaqii me.n aaftaab aaye

har rag-e-Khuu.N me.n phir charaGa.N ho 
saamane phir wo benaqaab aaye

umr ke har waraq pe dil ko nazar 
terii meher-o-wafaa ke baab aaye

kar rahaa thaa Gam-e-jahaa.N kaa hisaab 
aaj tum yaad behisaab aaye

na gaii tere Gam kii saradaarii 
dil me.n yuu.n roz inqalaab aaye

jal uThe bazm-e-Gair ke dar-o-baam 
jab bhii ham Khanamaa.N_Kharaab aaye

is tarah apanii Khamoshii guu.Njii 
goyaa har simt se jawaab aaye

'Faiz' thii raah sar basar ma.nzil 
ham jahaa.N pahu.Nche kaamayaab aaye